Ko Toolii mon ka Blog am

Ko fii honnɗun mbaa ngesa?

 

   
Jaɓɓorde:

Musiɓɓe tedduɓe,

On jaɓɓaama ka ngesa fulfulde ɗoo, no gelor-ɗon non wonnde geɓal fulfulde ngal ka internet hino barkiɗi, taw ko maa yarlitiiɓe men immanoo en fii anndinnde ɗemngal men ngal, wallitora ngal loowdi e nder kun ca'un internet, sabu ko ɗemngal woni wonkii leñol. Si a nanii fulɓe, ko si fulfulde hino winndeede janngee jannginee.

Hiɗon anndi gila ko neeɓi, gooto kala hino tiɗnoraade yeru mun on fii ɓamtal pinal mun e ɗemngal mun, ko haɗata fulɓe ɓen kadi Afrik ɓamtude pine maɓɓe? 

Haray non janngude ɗemngal mun ngal, hollaa tertaade ɗeya ɗemɗe. Ɗum ko faayere; sabu janngugol ɗemɗe goo hino moƴƴani en fota wonaa seeɗa, ngam no aduna on udditorana en, tawde ko no neɗɗo on janngiri ɗemɗe woo, aduna on udditorannta mo hoyana mo; kadi newanoo mo e dow yaajeende.

Kono si en taskike banndiraaɓe tedduɓe, en taway alaa ko ɓuri fotude ka aduna ɗoo, haa hewtitoo janngude janngina ɗemngal mun, tambitoo fii no ngal ɓamtora e kala bannge, wano ɓeya gerdiri non, sabu yiɗugol hoore-mun wonaa añangol goɗɗo goo!

Awa ɓandiraaɓe tedduɓe,

En torondirii en fof wakkilanagol ɗemngal men ngal yeru taaqa (fehre) me'en on; haa ɓiɓɓe men ɓen fina tawa hiɓe mari ko timmi tis, ko aldaa e jiɓi-liɓi, ɗum wonay sabu haa heddoren naamuuji men e finaa-tawaaji men.

E nder mbaa ngesa (blog) ɗoo non, miɗo etoo yollugol yoga e piiji, ɗi mi mari taaqa e mun: Immorde e ko ɗemngal ngal hatonjini e wayleed wano Jannde, Gannde, Diina, Renndo ekn

 

Soondo kala, mi mooɓay mi suɓoo kala ko mi tawi hino nafitoree, mi saaka ɗum e mbaa ngesa, fii yo ɓiɓɓe fulɓe nafitor ɗum!

Kala ko tawu-ɗon gaa ko wonndi e nafa, hiɗon newnanaa wallitorgol, ko wano non kadi kala ko hawru-ɗon gaa ko wonndi e jiɓi-lɓi, haray on toraama yowre (commentaire/coment), ngam mi jaabitoo on. Fahin, miijooji mon e pehe mon hino yaakitoraa no ngesa mban mawnira.

Mi sakkitoray kadi fahim wi’ugol: Ko toolii mon ka Blog am!

 

Tafsir BALDE

 

Hollital:

Ko teddungal e mon janngooɓe tedduɓe, en heɓii lowre timmunde, ka waaweten remude, fotten winnden, janngen nafitoren, ka ɗemngal men, hinde innee: Misiide Ɓamtaare.

Ko jokkorde nden nii: www.misiide.net

Bismillah mon

Créer un site gratuit avec e-monsite - Signaler un contenu illicite sur ce site

×