Honto wor6e ful6e 6en woni?

Rewɓe Fulɓe piyaama, yennaama, hoynaama

Ka nder galleeji maɓɓe doolaama, waraama …

28 September ko ka yaasi ɓe wallinaa

Ko Alla yiɗaa yarlaaki ɓe waɗaa, ɓe waraa …

Aduna fow yi’i ɓe, Fulɓe jalaa

Waytama ɓe alaa worɓe, ɓe maraa …

Honto worɓe Fulɓe ɓen woni?

Fewndo Nduru Buuse ɓe dogi …

Hannde ɓe dartori peɗa e kolli

Naa pinka e kure, naa aalaaji …

Rewɓe Fulɓe no hoynee

Rewɓe Fulɓe no yennee …

Rewɓe Fulɓe no doolee

Ɓe wi’ee “on bammbaali worɓe” …

“On bammbaali laamɓe”

Worɓe Fulɓe danndaano men …

Hanki, danndaali men hannde

Ko haɗi on tiindaade hare nden onon ɓee worɓe …

Ko waɗi hiɗon huli bonnaneede ?

On hulaa doolaneede rewɓe …

Ko waɗi on soodiraali jawle mon pinkaaje ?

Aron dartoɗon jaɓon haɓideede …

Reenon ndimu mon, ko on toonyaaɓe

Danndugol ɓeynguure mon no waɗii on …

Danndugol jawle mon no waɗɗii on

Danndugol lenyol mon no waɗɗii on …

Danndugol leydi mon no waɗɗii on

Ɗum gasataa e dogudu e kulol reedu …

Maa ɗuɗɗingol haala e konnaagu

Si on danndaali men, hommbo danndata men …

Si on hiwaali men, hommbo hiwata men

Hiɗon yalti hiɗon doga tun e leyɗe …

Gine on yiɗaa laamaade

Faalaaɗo laamu ɗoo o haɓɓay mba …

Faalaaɗo ndimu o ƴettay pinka

O dartoo o fella …

“Si a hulii jokkugol ko saanii e maa

Si a hulii udditugol miijo maaɗa” …

A luttay e woy way haa maayaa

A wontay maccuɗo anyuɓe maa …

Faɗaa teddungal luttaa e lette

Waaloɗaa foccanoɗaa mayde.

Kɗl: Ummu Kuntuumi Bah, Canada

Aucune note. Soyez le premier à attribuer une note !

Ajouter un commentaire

Vous utilisez un logiciel de type AdBlock, qui bloque le service de captchas publicitaires utilisé sur ce site. Pour pouvoir envoyer votre message, désactivez Adblock.

Créer un site gratuit avec e-monsite - Signaler un contenu illicite sur ce site