Mayde Foodee

hakim.jpgInnde makko ko Foodee Maamuudu Ba, o Jamaa Hakim (Ñeeno) sabu ko o ñeeni kon e gannde kese ɗen! Jibinannde 1988 Pita, o maayi ñannde 22/09/2012. Foodee ko koojaa hoɗi e nder simbaya gaar on, hi mo lolliri wattugol  kaɓnorɗe hiiso (Ordinateer), kala ronnkiduɗo e hiisorgel mun ngel ko haa ka makko addata, o wattay o jannay o sooday o yeeyay…

Mi anndu Foodee gila 2005 e battane wattugol ɗee hiisorɗe, ngal Ganndal weli lam o Tawaa e ɓurtuɓe yiɗinngol lam ngal Ganndal! Men waɗti jokkondirde bimmbi e kiikiiɗe jemma e ñalorma haa mi anndi ko ɗuuɗi e maggal…

Kawtal ngal kadi foɓ yiɗi Foodee sabu jikku makko moƴƴo, o haajaaka e kun goɗɗo, hi mo wakkilanii hoore makko, e kadi o aldaa e samakala ko sukaaɓe anndiraa…!

Ɓaawo duuɓi Jowi ko mi waɗi kon Marok fii Jannde Alla newnanno lam yahugol gurte e ndee hitaande 2012, mi yiidi e Foode tawi o heɓiino nokkuure ka o golla; mi tawi hi mo janna ɗon waɗtora e wonndeeje.

Awa ɓaawo nde sellu dalen iwtunoo Amerik e Alatti on, kamɓe lidduyannke en (oppositions) ɓe yuɓɓi seppuru (marche) laamu ngun kadi nenani ɓe, ɗum laati e Alkamisa hikkuɗo on ɗon, Jamaa ɗuuɗuɓe yalti e ley ndiyam tawdeede e ndun seppuru…Kono ɗum sakkitorii no kaaniri; tawde non konnaagu tiiɗungu waɗuno hakkunde fulɓe e maninnka, njulaaɓe ɓen madiina juhaa ɓe sertiri ton hoccorana nam ngal! Weeti bimmbi mun sukaaɓe fulɓe goo waɗti sakkaade otooje ɗen ratooma fii jippinngol focca kala mo wonaa pullo…! Ɗum jokkondiri ko yahata yonntere hakkunde ɗii leƴƴi ɗiɗi, laamu ngun saakiti ratooma on fow cokko, ɓe waɗti jinndude ton jemma e ñalorma, hi no raɗoo fayɓe fiɗa ɓe conndi Ñamaku fellora woɓɓe…!

Ko e nder ɗum Foode ƴetti moto mun on ka sikkitee ɗon hare lannii, ɗum o tummbere jemma, o fokkitiri bambeto yahanngol hiisorgel goɗɗo ko o waɗta, nde o hewtunoo bambeto, dakkali ɗin fewtini kural e makko ɓe felli mo ka hoore! O laatii furee, ka gooto miijataa! Ɓe moltini ko o joginoo kon, ɓe weddoyii furee on ka morgue donnkaa, ee ko yurmi! Wi’aa waɗaa wariree nii wa gerto kun, yalta maamadi e ben mun! Mayde makko anndaade woo hari ñallitii, taw no yumma foodee humpitoraynoo mayde geɗal maɓɓe on?! Alla ko lamɗo!!

Foodee maayii sabu sellu, hara le o wi’aa o waɗaa! Furee on juulaa e juma no UFDG eɓɓirnoo non, hara Jamaa on fow mooɓondiray fii waɗtinoygol mo.

Juma hewtii, Jamaa on fow fottii ratooma fii waɗtingol ngol, yimɓe ɗuuɗi, haaju njano waɗi, Foodee surraa haala kan maayi ka surridaa e makko ɗon, a sikka ɗum yonaa ko wulitoree!

Ko ɓuri saɗtude kon, ko nde tawde si goɗɗo wariraama sabu ɓee lidduyannkooɓe, ɗum wattete haala Rajoo, nanaa woɓɓe e maɓɓe no wi’ana janndiyanko en: “Hannde kadi ɓe warii hasaabe kaari sabu tumbondiral fedde nden”! A sikkay ko si goɗɗo maayii fii maɓɓe woni ɓe toowii! Ɗum no sattii mi woondirii Alla! A anndtataa non ko ɗum saɗti kon haa tuma mo maa waraa, ko ɗon anndataa ko ɗum saɗti kon! Sabu si goɗɗo waraama sabu ɓee, ko yo o yewtu o ñaana o hulɓirina ɗii dakkali shariya windereyanke nden, o holla mettii mo,…Hara naa yetirgol ɗum wa si ontigi hollitay woni! Ɗum no saɗti, en tawaama e Jamaanu hulɓiniingu!

            Yo Alla rewu laaɓal e kala tone sugu ɗee, o yurmee Foode e kala wariraaɗo nii, o fewna ɗii dakkali warooji himɓe a sikkay kulle buruure, si o fewnataaɓe le yo o danndu en bone maɓɓe!

Aamiina.

 

1 vote. Moyenne 1.00 sur 5.

Ajouter un commentaire

Vous utilisez un logiciel de type AdBlock, qui bloque le service de captchas publicitaires utilisé sur ce site. Pour pouvoir envoyer votre message, désactivez Adblock.

Créer un site gratuit avec e-monsite - Signaler un contenu illicite sur ce site

×