Hoorirgol newaare

Julɓe ɓen fof hino fottani wonnde Suumaaye ko lewru heewundu Nafooreeeji, ɗin Nafooreeeji non hino wona e banngal Diina maaɗun e Cellal...Nde tawude non Doftooruuɓe ɓen fensitanii en yoga e ɗin naforeeji yowondirɗi e korka wondude e moƴƴere nde neɗɗo hooruɗo on maranaa ka Alla ñannde njoddi Diina.

Hino tawaa e nafooreeji Cellal yowondirɗi e korka kan ; tawude ɗun hino wona sabu artirgol softeende e ɓamndu neɗɗannke on, ɗuyta nebbeele fawuɗe e ɓamndu onntigi wano kooko wi'etee Kolesterool, e ko nanndi e ɗun.

Hikka non (1432/2011), lewru suumayee ndun hawrii e Ceeɗu wonndude e naange tiiɗunge e nokkeeli keewuɗi e nder Aduna on, nde tawde non ɗun wonay sabu haa tawa ñalorma on juutay ɓuri jemma on e nokkeeli goo ; ɗun yaha haa wano saa'aaji 15 hooraaɗi e nder ñallal ngal !

E nder hen, yoga e julɓe goo lamndi too hoore mun, taw no hoorirten hikka e ndee nguleendi ndi sertataa e ɗomka ?!

E ɗii binɗi arooji ɗoo, hiɗen anndinntina yoga waajuuji ɗi Doftooruuɓe ɓen yamiri wallitorgol haa tawa julɗo on so'ataa ɗunka panndi e ñalormaaje suumaayee ɗen ka ley nannge :

Ko adii ko tawo fof ; hiɓe waajoo yarugol ndiyan ko ɗuuɗi gila ka ɓaawo hunntaari haa ka takko subaka ; nde feere mun heɓii woo, ko wano non kadi hiɓe waajii ɗuɗɗin ngol yarugol Ɓiɗam (Jus de fruit), hara koko aldaa e sukkar maa hara ko seeɗa jillaa e mun. Ɗii ɗoo fof hino lonntina e ɓamndu ndun ko ndu faɗata kon ñalorma.

Hiɓe waajii kadi ñaamugol ɗin ñaameteeji neeɓayɗi ka reedu ; hara ko ñaameteeji tedduɗi, haray wonaa konko neɗɗo on ñaamata tun seeɗa kadi o weelee.

Hiɓe waajii kadi ɓeyditorgol Ɓiɓɓe leɗɗe wano Manngo, Banaana....ekn

Hiɓe jertini ñaamugol ko defirtee e yaawere, wano sa'a ƴakka...Maa yarugol ataayaa fooruɗo ; nde tawu non ɗun sabinnbinay ɗuuɗugol takkitagol !!

Ɗiiɗoo ko yoga e waajuuji e Doftooruuɓe men ɓen yamiri en wallitogol ka suumayee fii ɗuytugol tammpere nden wonande hoorooɓe e ley nannge e dow newaare, yo Alla newnan en nafitorgol ɗii waajuuji, o jaɓana en korka men kan, o ɓeydana en doole e cemmbe fii daranagol nduu lewru suumayee. Aamiin.

kɗl : Tafsir BALDE