Nyalormaaje Suumaaye den

Nde taude kala gollal moƴƴal ngal julɗo on golli e nder nduu lewru suumayee ; njoddi ɗun hino sowee cowanlle cowanlle, fotiino hara julɗo on eɓɓindanoo nduu lewru waɗugol golleji moƴƴi jemma e ñalorma, bimmbi e kiikiɗe, fii heɓugol yurmeende Alla.

E nder ndee windannde ɗoo, miɗo yiɗi hunagol julɓe siɓɓe am ɓen yoga e golle ɗe ɓe waawata jokkude ɓe jillora e golleji maɓɓe moƴƴi ɗi ɓe duuminoo e mun nder ñalaaɗe nduu lewru teddundu.

Nden eɓɓoore hino fuɗɗoo ka takko subaka ko adii saa'a suguli on seeɗa, julɗo on immoo, o salligoo, o juulaa yeru ko newanii mo woo e darɗe, refti o toroo Alla, o du'oo, o jannga Alquraana, o sakkitora witiri on (Hay si tawii non o juuliino witiri ka naafe, wonaa ella, ella on ko juulugol witiriije ɗiɗi e jemma gooto), si ɗon feƴƴii, o ndaara no o sugulora hay si ko tamaroore ko fanɗi woo maa ndin seeɗa fii ñenntinngol nulaaɗo Muhammadu (S.A.W).

Ɓaawo suguli on julɗo on jooɗoo e subbun hinagol, maa janngugol Alqur'aana, maa toragol Alla haa subaka on noddinee, si no nodiineede, o jokkitoo salliijo on wano no nulaaɗo men yamiriri en non haa ka timmoode, si ɗun feƴƴii, julɗo on waɗa darɗe ɗiɗi (2) ado subaka on ko adii o yahhude ka juulirde, o toroo Alla kadi.

Ɓaawo julde subaka on, o waɗa Ajkaaru on, si ɗon feƴƴii o jannga Alqur'aana seeɗa, si himo ŋoŋi o ɗaanoo ko hawri.

Ɓaawo julde bee o gerdira nii, (janntoore Alla, janngulgol Alqur'aana...), haa ka takko futuroo o jooɗanoo Ajkaaru kiikiiɗe yankeejo on, ko adii futuroo on naatude, si ɗon feƴƴii on hunntoo, hara o yejjitaali janntaade du'aaji aruɗi ko adii hunntaari ndin e ɓaawo mayri.

Ko wano nii julɗo on duwaa hebbinirde ñalormaaji mun ɗin e nder nduu lewru tedduu ndu ko adii ndu lannude, hara o heɓii ɓuy ko o waɗi e moƴƴereeji.

Yo Alla jaɓan en korka men kan. Aamiin.

 

Kɗl : Tafsiir BALDE

 

Aucune note. Soyez le premier à attribuer une note !

Ajouter un commentaire

Vous utilisez un logiciel de type AdBlock, qui bloque le service de captchas publicitaires utilisé sur ce site. Pour pouvoir envoyer votre message, désactivez Adblock.

Créer un site gratuit avec e-monsite - Signaler un contenu illicite sur ce site

×