Paji Hooroo6e goo

Musiɓɓe juɓe tedduɓe, suumayee on wonaa hoorugol ngol sattil, ko jogitagol ngol hoore mun e haɗaaɗi ɗin woni ko satti, awa haɗaaɗi ɗuuɗi hino ton tawayɗi hino baraaji hooruɗo on maa toode ɗin haɗaaɗi wona sabu haa korka makko kan bona ; yo Alla danndu en ! Kono Alla kadi danndii conndi woo si ndi haɓɓii !!

E nder ndee windannde ɗoo, en etoto janntagol yoga e ɗen palje nde tawde non hiɗe ɗuuɗi fota ; ɗi heƴataa e ɗerol !!

 

Paljere Aranere nden :

Ko yennugol huɗa, maa wowla sonnka, kennkita jala, jokka nani nani, maa ñoore e waddi ndiral, ekn

Ɗii sifaaji ɗoo musiɓɓe tedduɓe, ko haɗaaɗi ka diina men e tuma kala, tenntinii non e nduu lewru teddundu (Suumaaye).

Nulaaɗo (SAW) maaki : « Yennore julɗo on ko faasiqaaku, haɓideede makko ko keeferaagu »

Julɗo on hino duwaa howude reena ɗemngal makko ngal fewndo kala, foti ko e suumayee maa ko hinaa ɗun !!

 

Paljere Ɗimmere nden :

Ko funnsugol ka ñaametee, liiba haa lutta bonora e nder hen ; tawa waasuɓe goo hino lelliri ko ñaama, ɗunɗon ko faayere yo Musiɓɓe julɓe, eɓɓanen ko ñaameten kon ka suumayee, si luttii okkitiren hatonnjiɓe ɓen...

 

Paljere Tammere nden :

Ko ɗaanagol feƴƴiinita e ñalormaaje suumayee ɗen fii wota so'u korka kan ; ɗun wona sabu haa julɗo on derfa juulugol e maqtu, maa julde jamaa..., nde tawde non kannko julɗo on himo duwaa hebbinorde dewe heewude wonndude e korka kan haa no moƴƴereeji ɗuuɗira ka Alla, wano duumagol e janntagol, maa janngugol Alqur'aana, ekn...

 

Paljere Nayaɓere nden :

Ko duumagol e ndaarugol Tele jemma e ñalorama haa tawa ɗun wonay sabu naɓugol waqtu buy wonande julɗo on !

Musiɓɓe Julɓe Tedduɓe, ko no mi holliri non ka fuɗɗorde, sugu ɗee palje yoga e men ɗoo hino ɗuuɗi fota fota, kono ɗiiɗoo ko tawaaɗi e ɓuruɗi mawnude ; hay si tawii wonaa kannji foɓ nii, miɗo haaɗa wano ɗoo haa ñannde goo kadi !

 

Yo Alla jaɓan e korka men kan !! Aamiin

 

Tafsiir BALDE

Aucune note. Soyez le premier à attribuer une note !

Ajouter un commentaire

Vous utilisez un logiciel de type AdBlock, qui bloque le service de captchas publicitaires utilisé sur ce site. Pour pouvoir envoyer votre message, désactivez Adblock.

Créer un site gratuit avec e-monsite - Signaler un contenu illicite sur ce site

×