Fii Nimse

 

Ko debbo goo[1] joginoo njaatigiwel gootel e nder kulle ɗen, ngel njaatigiwel makko ko ñaariwel[2] wonnoo. Tuma[3] kala nde o yaltata, o ƴetta ɓiɗɗo makko on o halfina ñaariiru ndun, tuma kala nde o nanngata golle kadi ka yaasi, hara[4] ñaariiru ndun hino jooɗii takko oo boobo[5] hindu ayna.

Ñalnde goo debbo on accidi ñaaariiru ndun boobo on, o yalti no woowiri non, o yahi. E nder ɗum, fintoori moltii ari soppugol boobo on, tun kayri e ñaariiru ndun ɗi nanngondiri, ndu ɓoɓi hoore mayri, ndu wari ndi, ndu hawkoyi ka suntuure, ndu arti ndu jooɗii takko boobo on.

Debbo on artoyi o fokkiti naatugol ka suudu, tun o tawi ƴiiƴam hino moddi e oo boobo makko, o yiilti gite o tawi ñaariiru ndun hino meeɗtitoo batte ƴiiƴam, o inni[6]: pellet nduu ñaariiru dekkii[7] ɓiɗɗo am on! O kutii[8] leggal o rowtiri e hoore ñaariiru ndun, ndu maayi[9].

Boobo on ka waalii ɗon maƴi! O tawi boobo on maayaali, o yalti ka suntuure o tawi taggere ndii mboddi hino waalii, o nimsiti[10] ko o waɗi kon, o tawi o warii giɗo makko on.


[1] Goo: gooto

[2] Ñaariiru: ullundu, faatuuru

[3] Tuma: saa’i, wakkati, saanga, waktu

[4] Hara: hawra, tawa

[5] Boobo: cukalel, ɓinngel tokosel (pamarel)

[6] Inni: wii

[7] Dekkii: ñaamii

[8] Kutii: ballii, ƴettirgol huunde hawjere maa heppere

[9] Ndu maayi: ndu waati

[10] Nimsiti: wasmiti

Kɗl: Tafsiir Duntu Balde, Marok/ tafsir_salambande@hotmail.fr

www.peeral.com

1 vote. Moyenne 2.00 sur 5.

Ajouter un commentaire

Vous utilisez un logiciel de type AdBlock, qui bloque le service de captchas publicitaires utilisé sur ce site. Pour pouvoir envoyer votre message, désactivez Adblock.

Créer un site gratuit avec e-monsite - Signaler un contenu illicite sur ce site

×